శర్మ కాలక్షేపంకబుర్లు-తిండిగోల

Posted on జూలై 20, 2012
43
తిండి గోల.

పుట్టిన ప్రతి ప్రాణికి ఆహారం, నిద్ర, భయం, మైధునాలు సమానమన్నారు, మన పెద్దలు. ఇప్పుడు మనం వివిధ జీవుల ఆహారపు అలవాట్లు చూద్దాం.

మాంసాహార జంతువులలో సింహం గుంపుగా వేటాడుతుంది. ఆడ సింహం తరుముతుంది, మగ సింహం, ఇతర కుటుంబ సింహాలు వేటని పడతాయి. వాటి వేట వ్యూహం చూస్తే చాలా అశ్చర్యంగా ఉంటుంది. మొత్తం కుటుంబం వేటని సమిష్టిగా భోజనం చేస్తాయి. ఒక సింహం కనపడితే, గుంపు దగ్గరలో ఉందని గమనించాలి, అది కూడా కుటుంబం. పులి ఒకటిగానే వేటాడుతుంది. నిలవ పెడుతుంది. సింహం తాజాగా తింటుంది. మాంసాహారజీవులు శాకాహారజీవులను మాత్రమే, ఎక్కువగా వేటాడితింటాయి, కాని తోటి మాంసాహార జీవిని, ఎక్కువగా వేటాడవు, అదేమి చిత్రమో!. ఏనుగులు గుంపుగా తింటాయి, గుంపులో మగ ఏనుగు నాయకుడు, దాని వెనక అన్నీ వెళతాయి. చిలుకలు, పావురాలు, పిచుకలు, గుంపుగా వాలి ఆహారం తీసుకుంటాయి. చిత్రం తెలుసా! ఎలక చాలా తెలివయినది. ఎలకలు ఆహారం తీసుకునేటపుడు ముసలి ఎలుక ముందు తింటుంది. తిన్న ఎలక బాగుంటే, అంటే విష ప్రయోగం లేకపోతే, ఆ ఆహారాన్ని మిగిలినవి తింటాయి. కాకి చూడండి, ఆహారం దొరికితే కలబడి తినెయ్యదు, మిగిలిన వాటిని పిలిచి, వాటితో తనూ తింటుంది. కాకి ఆహారం కోసం ఇతరకాకులతో కలహించదు. కుక్క చూడండి ఆహారం కనబడితే కలబడిపోతుంది. మరొక కుక్క కనక వస్తే దానిని తిననివ్వకుండా మీద పడి అరుస్తుంది. సృష్టిలో తిన్న ఆహారాన్ని నెమరు వేసేది ఒక్క ఆవు మాత్రమే. అందుకే ఆవు చదువు చదువరా అన్నారు. ఎందులోకో పొతున్నా కదూ. మానవుడి ఆహారపు అలవాట్లు చూద్దాం. మానవుడు శాకాహారజీవి మాత్రమే కాని మాంసాహారానికి అలవాటి పడ్డాడంటారు, మా సత్యనారాయణ రాజుగారు.

నూట ఏబది సంవత్సరాల ముందు గో.జిలలో జొన్న, రాగివంటి చిరు ధాన్యాలే ఆహారం, ముఖ్యంగా. కలిగిన మహరాజులే వరి అన్నం తినేవారు. పాడి సమృద్ధిగా ఉండేది. ఇప్పటిలా పాలు పెరుగు అమ్ముకోడం, నాడు తెలియదు, కావలసిన వారికి ఊరకనే పోయడం తప్పించి. ఆవులనే ఎక్కువగా పోషించేవారు. వెన్న, నెయ్యి వాడేవారు. ఆవునెయ్యి తినడం మూలంగా కుశాగ్రబుద్ధి, జ్ఞాపక శక్తి కలిగేవి,పెరుగు చిలికి వెన్న తీసిన మజ్జిగ వాడేవారు. ఇప్పుడున్న కూరలే అప్పుడూ వండుకునేవారు, ఐతే కూర సంవత్సరం లో కొన్ని నెలలే దొరికేవి. సమృద్ధిగా దొరికినపుడు వాటిని కోసి ఎండపెట్టి ఒరుగు చేసేవారు. ఇందులో ముఖ్యమైనవి, వంకాయ,దొండకాయ,అరటికాయ, కాకరకాయలాటి వాటిని ఒరుగులు గా చేసేవారు. వంకాయ కూరకి, వరికూటికి విసుగు లేదనే వారు. ముఖ్యంగా మామిడికాయ, ఉసిరికాయ, చింతకాయలతో నిలవ పచ్చళ్ళు పెట్టేవారు. ఇప్పుడు మేము వెలగపళ్ళు, నిలవ పచ్చడి పెడతాం, సంవత్సరం వాడుకోడానికి,బాగుంటుంది, నిలవుంటుంది. దోసకాయతో కూడా ఊరగాయపెడతాం. దోసతిన్న కడుపని సామెత, సంచీ దులిపేసినట్లు జీర్ణవ్యవస్తని ఖాళీ చేసేస్తుంది. నేటి కూరలూ బాగానే ఉంటాయి. దుంప కూరలు తిని తీరాలి. ఆకు కూరలయితే చెప్పేదే లేదు. ఎన్ని ఆకులో, చింతచిగురు,షీకాయాకు చిగురు, తోటకూర, గోంగూర, బచ్చలి, పొన్నగంటి కూర, తెలగపిండి కూర,కరివేపాకు,బలుసు కూర, బలుసు లేని తద్దినం బులుసు లేని యజ్ఞం లేదని సామెత. నెల్లి కూర, నల్లేరు, ఇది పచ్చడి చేసుకు తింటే కీళ్ళ నెప్పులు తగ్గుతాయి. గల్జేరు చేదుగా ఉంటుంది, వదలని కడుపులో క్రిమిరోగాలకి మందు, పచ్చడి చేసుకుతింటారు. తోటకూర పచ్చడి చేసుకుంటారు తెలుసా. ములగ కూర ఆషాఢ మాసం లో తిని తీరుతాము. దీనితో ఐరన్ చేరుతుంది, కరివేపాకు, కొత్తిమీర తో లాగా. బచ్చలి కూర తింటే థయిరాయిడ్ బాగా పని చేస్తుంది.

మరి పప్పుల దగ్గరకొస్తే కందిపప్పు రాజు, పెసరపప్పు మంత్రి. మిగిలిన పప్పులు మినప, బొబ్బర్లు,చిక్కుడు,శనగపప్పు ముఖ్యమైనవి. వీటిని రక రకాలుగా తయారు చేస్తారు. మాకూ రోజూ కందిపప్పు లేకపోతే గడవదు, ముద్ద దిగదు. కందిపొడి మరొక గొప్ప రుచికల ఆహారం. శనగ, కంది, పెసరపప్పులతో పాఠోళీ అని చేస్తారు బలే ఉంటుంది. ఇప్పుడు ఫైవ్ స్టార్ హోటళ్ళలో ఇది గొప్ప రెసిపి. మాకయితే వారంకి ఒక సారి తప్పదు. అలాగే మెంతి మజ్జిగ కూడా ఫైవ్ స్టార్ రెసిపి. దీన్ని చేసే విధానం బాగుంటుంది. మజ్జిగలో ఉప్పు, పసుపు వేస్తారు. పోపుకి మిర్చి, ఆవాలు, మెంతులు, జీలకర్ర వేస్తారు. దీనిని ఇనపగరిటలో కొద్దిగా నేతి తో వేయించి ఇనపగరిటను పోపుతో కలిపి మజ్జిగలో ముంచుతారు. అలా కాలిన ఇనప గరిట ముంచడం మూలంగా అందులో ఐరన్ చేరుతుంది. మా ఇళ్ళలో ఇనపగరిటలు ఉండేవి, ఇప్పుడు వాడటం మానేశారు,ఇనపగరిట తోమినది తెల్లగా మెరిసేది. అది వదిలేసి ఐరన్ టేబ్లెట్స్ మింగుతున్నాం. మరో ముచ్చట రాతి చిప్పలని ఉండేవి. ఇది రాతితో తయారయినది. ఇందులో పులుసు కాచేవారు. దీనిని పొయ్యి మీద పెట్టేందుకు వీలుగా బయట తడి మట్టి రాసేవారు. దానికి మంట సన్నగా తగిలితే పులుసు బలే రుచిగా ఉండేది. ఇంగువ వాడేవారు. ఇది జీర్ణప్రక్రియకు దోహదకారి, మంచి సువాసన వస్తుంది ఆహారానికి. రాతిచిప్పతో ఖనిజలవణాలు శరీరం లో చేరేవి ఆహారంతో. రాతి చిప్పలో వండిన పులుసు సత్తు తప్పేలా అని జింక్ పాత్రలో పోసేవారు, దానితో శరీరానికి కావలసిన జింక్ అందేది.. ఇప్పుడు ప్రతి దానితో జింక్ తీసుకోమని డాక్టర్ల శలవు. సోడియం విత్ జింక్, కాల్షియం విత్ జింక్ ఇలా, ఈ జింక్ పాత్రల వాడకం పోయింది. రాతిచిప్పలు ఉప్పు పోయడానికి వాడే వారు. ఆ అలవాటూ పోయింది. అయోడిన్ రాతి చిప్ప ద్వారా చేరేదేమో తెలియదు. మజ్జిగపులుసు కూడా ఫైవ్ స్టార్ రెసిపి. మా పల్లెలలో బాగా దొరికే,మేము ఎక్కసంగా చూసే బొప్పాయి పండు ముక్కలుకోసి ఫైవ్ స్టార్ వారు పెడుతున్నారు, స్పెషల్ పేరుతో.

ఇక మాంసాహారులలో చాలా ముఖ్యంగా గోదావరి జిల్లాలలో మాత్రమే ఉండే ఒక గొప్ప వంటకం, పులస చేప. ఇది ఆస్ట్రేలియా తీరంనుంచి బయలుదేరివస్తుంది, దీనిని విలస అంటారు. కొత్త గోదావరి నీటిలో తొందరగా పెరిగి ధ్వళేశ్వరం బేరేజ్ దగ్గర దొరికే చేప, దీనిని పులస అంటారు. దీన్ని తినాలి కాని, రుచి వర్ణించి చెప్పటం కష్టమంటారు, తెలిసినవారు. చేపను శుభ్రం చేసి ముక్కలుకోసి మసాళా వగైరాలు వేసి వండిన తరవాత ఇందులో వంటాముదం పోస్తారు. ఇది రెండు రోజులు మగ్గిన తరవాత మూడవ రోజు తింటే అద్భుతమైన రుచి ఉంటుందట.ఈ చేపల కూర చేయడం అందరివల్లా కాదు, కొంతమంది నిపుణులు చేస్తేనే దానికి రుచి వస్తుందట. దీన్ని నజరానా గా పై ఊళ్ళలో వారికి, వండించి పంపడం గో.జి ల మర్యాదలలో ఒకటి. మరొకటి రామలు, చింత చిగురు కలిపి వండుతారు. రామలు అంటే చిన్న చిన్న గా ఉన్న చేపపిల్లలు. వీటిని మెత్తళ్ళు అని కూడా అంటారనుకుంటా. ఇది కూడా గో.జిల కి ప్రసిద్ధి వంటకం. మాంసాహారులు ఎక్కువగా వాడే ఉల్లి, వెల్లుల్లి,ధనియాలు, మిరియాలు, జాజికాయ, జాపత్రి,గసగసాలు,లవంగం అన్నీ ఔషధాలే.

ఇంత రుచికరమైన, బలవర్ధక సమీకృత ఆహారాన్ని అరటి ఆకులో వేడిగా తినేవారం. ఇప్పుడు కుక్కర్లో వండుకుని హాట్ పేక్ లో కుక్కుకుంటున్నాం, రాగి పాత్రలో అన్నం వంట పోయింది. అరటాకు,తామరాకు, మోదుగాకుల విస్తరి, అడ్డాకుల విస్తరి,బాదం ఆకుల విస్తరి,ఇలా ఆకుల విస్తరిలో తింటే దానినుంచి కూడా శరీరానికి కావలసిన పదార్ధాలు చేరేవి, క్లోరోఫిల్ లాటివి. లేకపోతే వెండి కంచం,కంచుకంచం,వాడేవారు. ఇప్పుడో స్టీల్ వాడుతున్నాం దానితో శరీరానికి అవసరమైనవి చేరకపోయినా ఆర్సెనిక్ లాటి విషాలు చేరుతున్నాయి, స్టీల్ సరిగా తయారు చేయనందుకుగాను. భోజనం తర్వాత సున్నం, వక్కతో,పచ్చ కర్పూరంతో తామలపాకు తాంబూలం గొప్ప అనుభూతి, ఆరోగ్యానికి మంచిది, కేల్షియం చేరేది. మంచి నీరు రాగి బిందెలు,ఇత్తడి బిందెలలో నిలవ చేసేవారు. రాగి చెంబులో నీరు తాగేవారు. ఇదో పిచ్చి, మేము ఇప్పటికీ ఇవి వాడుతున్నాం. ఇత్తడి బిందెలో నిలవ ఉంచిన నీటిలో ఏదో ప్రత్యేకతని కనిపెట్టేరు యీ మధ్య. ప్లాస్టిక్ బాటిళ్ళలో నీళ్ళు తాగుతున్నాం. ప్రకృతికి దూరంగా జీవిస్తున్నాం. మనం పెద్దలు ఏమయితే చేయద్దన్నారో అదే చేస్తున్నాం. నిలబడి ఆహారం తీసుకోవద్దన్నారు, చేతిలో పెట్టుకుని తినవద్దన్నారు, పాద రక్షలతో భోజనం వద్దన్నారు, నెత్తిమీద శిరోవేష్టం తో భోజనం వద్దన్నారు, కాని తప్పటం లేదు

ప్రకటనలు

రచయిత: kastephale

A retired telecom engineer.

2 thoughts on “శర్మ కాలక్షేపంకబుర్లు-తిండిగోల”

  1. గురువుగారు, నలభీములతో పాటు ధన్వంతరి దర్శనం చేయించారు. కొన్నాళ్ళ క్రితం ఈ వ్యాసం చదివానుమీ పోస్టులో అంత అందంగా కాకపోయినా సాంప్రదాయిక విజ్ఞానం తిరిగి ప్రాముఖ్యతని, ప్రకృతిలో భాగమైన జీవనవిధానాన్ని ఆసక్తికరంగా వివరించారు పాశ్చాత్య రీతిలో –
    // I spent three days as a hunter-gatherer to see if it would improve my gut health//
    https://scroll.in/article/842581/i-spent-three-days-as-a-hunter-gatherer-to-see-if-it-would-improve-my-gut-health

    మెచ్చుకోండి

స్పందించండి

Fill in your details below or click an icon to log in:

వర్డ్‌ప్రెస్.కామ్ లోగో

You are commenting using your WordPress.com account. నిష్క్రమించు / మార్చు )

ట్విటర్ చిత్రం

You are commenting using your Twitter account. నిష్క్రమించు / మార్చు )

ఫేస్‌బుక్ చిత్రం

You are commenting using your Facebook account. నిష్క్రమించు / మార్చు )

గూగుల్+ చిత్రం

You are commenting using your Google+ account. నిష్క్రమించు / మార్చు )

Connecting to %s